zondag 24 maart 2019

Tuun

Meart a weer! Wat vlog de tied, zo bei nog druk in de tuun en zo hoef ie niks meer. Wulle bint de feestdaag'n weer goed deur ekoom'n. Met de kerst hak de sleutel in de buuse, ok niet geheel onbelangriek. Ik binne in het naojoar nog aordig druk ewest, niet alinnig blad hark'n maor ik hebbe aordig veule boom' weg ehaald. D'r stund'n veule Amerikaanse eiken bie mekare en die hek met de knetterbiele umme zaagt.
De stubbegies bleem staon, anders mos ik er met de schuppe bie en ik hadde genog te doen. Noe hak maor bedacht det ik d'r mar grond over hen mosse doen, dan stund'n de stubbegies mooi donker en dan kwam er geen licht meer bie en kon det hele zakie niet meer uut loop'n.
En net toen et allemaole van een leien dakkie gunk, mos Fennigje zo neudig weer een paar daag'n naor heur zuster hen. Het hef twee kanten. Ie kunt doen en laoten wat ai wilt, maor d'r is ok gien gezelligheid an, in de aomd hei ok nog weer wat te praot'n en det mis ie dan toch wéh een bettie.
Ik krege een brieffie van Fennigje waor op stunt hoe of ik de wasse mosse dreien. Tuurlijk Fennigje, gao ie noe mar weg, ik redde mie d'r met!
En de volgende dag waar ik a vrog op, eerst die wasse an het dreien.....ik kieke op het brieffie en van het brieffie naor de wasmachine en konne wéh jank'n!
Disse blouse was veur de handwasse, maar d'r zat geen knoppe op met handwasse!
En hier op de machine zit een knoppe met "voorwas" maar de achterkante mut ok ewassen wurd'n.
En de knoppe die daornaost zat "weken" pfff, nee det mos vandage klaor! Ik wolle gien weken wachten!
Nóg zo'n onzinnig knoppie op mien wasmachine "hoofdwas"! Mien heufd was ik altied onder de pompe....ik hebbe ut probeerd, maor ak mien heufd in de machine doe, krieg ik de deure niet meer dichte....Affijn det was de wasse en as Fennigje weer thuus kwam, lag de wasse er vaste nog net zo.

Geen opmerkingen:

Een reactie posten