Wie trekt er allemaole weer massaal op uut. Echt op vakantie gaone wie niet, maor wie gaot nog wel iens een daggie weg. Zo ok disse keer binne wie een daggie naor Heer'nveen hen ewest. Ik hebbe daor nog wat familie zit'n. Een ome en tante waor ak nogal wies mee binne. Ome Klaas hef altied op de binnenvaart ezetten en tante Jannie gunk altied met. Zie hebt ok nooit gien kinders ehad net as wulle.
Affijn wie komt daor en nao de hartelijkst ontvangst met koffie en een gebakkie kwam dan toch de borrel op taofel. De worst mosse wie d'r maor bie denken want die hadden ze zelf de aomd erveur al op egetten, die was zo lekker ewest! En ik hebbe det wel goed verstaon, want zie magt dan weh Fries praoten, mar vestaon doe'k et weh!
Ik vreuge hoe et met de hond ging, och, zie waar'n er met naor de dierenarts hen ewest en de arts was zo'n joviale keer'l die had pillegies met edaon en alles gunk weer van een leien dakkie. Mien ome Klaas hef last van de suuker en ik vreuge hem hoe et daor met was? Och, hij was naor de dokter hen ewest, zo'n joviale keer'l die arts, hij had pillegies met ekreeg'n en het gunk allemaole weer goed!
Wie bint op tijd naor huus egaon, want de leste busse giet umme 19.05 van het station Zwolle naor Wietum. Die hebbe wie emist, dus de buur'n maor evrogd of ze ons op kond'n pikken. En met det wie thuus waar'n zeg ik teeg'n Fennigje det wie maor wat van de Molle mossen haal'n.
Dus effen later fietse ik naor de Molle hen en bestel daor wat patat met een gehaktballe, maor donders wat was et gezellig. Iederiene zat lekker op et terras. Van Krevel met de vrouwe, Freek met zien Nel en nog veule andren. Laote wie mar iens in een kolt biertie happ'n. Ie kent et wel, op ien bien kuj niet loop'n, dus doet er nog mar iene in! En daor kump Henry an met een bule patat, och, zet het daor mar effen neer, eerst mien biertie leug zoep'n. En veur de'k et in de gaat'n hadde stunt er al weer een vol biertie veur mie, en die gunk d'r ok wel in. Aaah jongens, ik mosse naor huus hen en ik vuule effen an de patat, daor kon'k niet met thuus kom, dus nije besteld en ondertussen blee'm de bierties mar kom'n. Kiek, ik spuge d'r niet in, ik lusse ze graag. En daor kump Henry weer an met een nije bule patat, ik binne mar snel op de fietse estapt naor huus an, want anders zult wie wat belee'm!
En met de'k thuus komme zie ik Fennigje niet an de taofel zit'n, die had mie natuurlijk an zien kom en dut natuurlijk de deure avaste veur mie lus!
Mar met de'k de deure lus doe, zie ik daor Fennigje staon met de bessum in de klavieren! En ik mosse zo lachen! Vus te veule bierties ehad, daor wui nogal lollig van.
En er kump iets uut mien kinnebakkes wa'k better niet had kunnen zeg'n!
" Wat noe dan? Muij nog veeg'n of goij nog vlieg'n?"
Ie begriept weh det ik det better niet had kunnen zeg'n!
Wieze lessen hoef ik noe niet te gee'm! Fennigje is nog weh lange kwaod op mie ewest!
Maak met zien allen wat moois van de vakantie, het weer hebt wulle al met!
Fijne vakantie allemaole!
De groet'n,
Hendrik
Geen opmerkingen:
Een reactie posten