Het is weer vakantietiet, een bulte lui bint al an't bedenk'n waor ze dit jaor weer naor toe mut gaon. Wulle bint daor niet zo van, wie bint alle daag'n vrij, wie hebt ut best naor on zin thuus. Wie gaot nog wel iens een daggie weg, zo bint wie veurig jaor een daggie naor Amsterdam hen ewest. Fennigje mut dan zo neudig effen op de Noordermarkt kiek'n. En met een bettie multicultureel gedoe hef ze dan weer kruuden evunden wat ze op het fleis uut mut probeer'n. Gef mie maar gewoon pepper en een bettie zolt.
Affijn wie kuiert wieder en gaon zitten om een breutie te etten. Ie konden d'r van alles krieg'n, rauw fleis, allerlei ham waorvan ik de name niet iens uut kon sprekken. Ach, een breutie gezond leek mie wel wat, det ken ik, met een eigie en een blaagie sloat, lekker! Het water liep mie in de mond. Een alleraordigste deerne kwam het breng'n. Ik nemme een hap en het begunt mie al te knisperen tussen mien kakement, ik nemme nog een hap en toen wus ik het. Zand!
Die sloat was nie goed uut ewassen! Ik roepe det deerntie en zegge det d'r zand in de sloat zit en zie kek mie an met die grote blauwe oog'n en dan kump het:" jammer hè!" Zie lachte naor mie en leup gewoon vort. En daor kon'k et met doen! De fooi hek in de zak eholden!
Maor daor wol ik het niet over hebben. Veurig jaor was het ok prachtig weer en ik hield het dan ok goed in de gaten wat de nachten zollen wurd'n. Want as de temperatuur een bettie goed was.... dan had ik een plannegie! En op een aovend zitte wulle naor het journaal te kiek'n en daor veurspelt ze veur in de nacht een temperatuur van 18 graoden!
Noe muk mien kanse griep'n! Dus heel veurzichtig vraoge ik an Fennigje of ze wel iens zwienen had ezeen? Det had ze niet, ik ok nie! De volgende vroge was of ze die wel een keer in de natuurlijke omgeving wilde zien? Det ging goed, de eugies begunt te glimm'n.
Umme een lang verhaal kurt te hol'n, zolle wie met een bestelwagentie van een bekende in de avond weg rieden umme zwienen te kiek'n op de Veluwe. Ik zolle alles regelen, dus op de fietse naor Dalfsen en bosschopp'n haal'n. Wat te kaan'n, een flessie amaretto van de Aldi en een paar bierties veur de argste dust. De slaopzak'n ha'k al van de zolder ehaald en in het wagentie elegd, de zaklampe mos ik nog effen pak'n en dan ware wie de klaor veur. Ons grote avontuur zwien'n kiek'n! Dus teeg'n de aomd riedde wie naor de Veluwe, et begunt al een bettie te scheemren, en ik keke dan ok goed uut de doppen waor of de zwien'n de grond hadd'n um ewoeld! En uuteindelijk hadde wie dan ok een mooi plekkie evund'n, en mooie grote ruimte veur ons en toch tussen de stuuk'n.
De happies werden teveurschien ehaald, de bierties gingen lus en wulle hadden een gezellige aomd, een bettie praot'n, lekker lachen umme mien streek' wak uut ehaald hadde en daor was het..... geluud uut et bos! Ik schiene met de zaklamp die ik ok eleend hadde, met gruun licht, want ik hebbe mie laoten vertellen det de dieren det niet kond'n zien. Wat dach ie? Een moes, det is nog geen zwien! Ik zei al teeg'n Fennigje det as er wat was det ik het wel zolle heuren en det wie de eugies maor effies dichte mossen doen, dus nog effen pissen en dan onder de slaopzakk'n kroep'n. Het wagentie was net te kort, mien voeten staken net buuten de auto. Het was warkelijk doodstil op de Veluwe dus mocht er een zwien kom'n dan zol ik em wel heuren! Niets! Ik hebbe echt niks meer eheurd en het ienige wak emerkt hebbe waren mien voet'n. De muggen hebt hun beste kante laoten zien!
Wie bint as een blok in slaop evall'n en met een klap wakker erwurd'n! Het leek wel onweer, geen zwien'n! Ik dee de doppen lus en..... kieke op een groot wit bord met rode letters! PAS OP GEVAARLIJK SCHIETTEREIN! Wulle bint as een speer daor weg egaon! Noe snap ik waorumme wie gien zwien hebt ezien! Ik zol jullie het commentaar van Fennigje bespaor'n! Die zwien'n wussen et! Behalve wulle!
De volgende dag kon ik op Facebook bekiek'n det d'r 23 muggen het e liked hadd'n det wulle d'r waren. Ik hadde de voet'n gewoon dikke van die muggen!
Nog een wieze lesse: Ai mutten pissen in 't bos, kiek dan effen of ie ok een teek hebt op eloop'n. De teeke hek er uut ehaald en Ik mosse de konte van Fennigje goed naokiek'n of d'r gien kringegie umme hen kwam. Fennigje is nog daag'n kwaod op mie ewest!
Hendrik
Geen opmerkingen:
Een reactie posten